Fundað með Rarik vegna rafmagnstruflana
Fulltrúar sveitarstjórnar Þingeyjarsveitar hafa fundað með Rarik vegna víðtækra rafmagnstruflana sem urðu þann 2. okóber sl. Mikið tjón varð í Mývatnssveit vegna yfirspennu sem eyðilagði rafmagnsbúnað og tæki.
Á fundi með fulltúrum Rarik kom fram að augnabliksgildi spennu og tíðni fóru út fyrir öll mörk sem gætu hæglega valdið tjóni á raftækjum og öðrum rafbúnaði viðskiptavina Rarik. Rarik fundaði með Landsneti 8. október sl. og þá var ákveðið að endurskoða og samræma varnarprinsipp í aðveitustöðinni í Reykjahlíð, bæði á 11 kV Landsnetsrofa sem er staðsettur í Kröflu og á innkomandi rofa Rarik með það að markmiði að minnka áhrif á viðskiptavini Rarik þegar svona sveiflur ganga yfir landskerfið. Einnig þarf að endurskoða stillingar á spennuvörnum í öðrum aðveitustöðvum á þessu svæði þar sem Norðurausturhornið virðist vera viðkvæmasti hluti landskerfisins. Lögðu fulltrúar Þingeyjarsveitar mikla áherslu á mikilvægi þess að tryggt yrði að svona atburður myndi ekki endurtaka sig.
Rétt er að benda á frétt hér á vefnum þar sem eru leiðbeiningar um tilkynningu á tjóni til Rarik. Einnig er rétt að benda á að tryggingafélag Landsnets, Sjóvá mun gera upp þau tjón sem koma til uppgjörs. Ef upp kemur ágreiningur um uppgjör á milli Sjóvá og viðskiptavina Rarik má beina bótamáli til Orkustofnunar sem sker úr um slíkan ágreining.
