Í kjölfar íbúafundar í Skjólbrekku

Í kjölfar íbúafundar í Skjólbrekku í gær, 24. október, telja fulltrúar sveitarfélagsins rétt að koma eftirfarandi á framfæri.

Í dag hafa fulltrúar sveitarfélagsins verið í sambandi við stjórnendur RARIK og Landsnets vegna bréfs sem Sjóvá sendi á tjónþola eftir að íbúafundinum lauk í gær. Bréfið var ekki í samræmi við upplýsingar sem komu fram á fundinum um að RARIK og Landsnet viðurkenna bótaskyldu vegna atburðarins sem varð af völdum rafmagnsleysis þann 2. október.

Jafnframt var óskað eftir ítarlegri upplýsingum um hvernig yrði staðið að uppgjöri tjóna vegna atburðarins 2. október sl. Eftirfarandi upplýsingar hafa borist sveitarfélaginu frá RARIK og Landsneti.

• Skaðabótaábyrgð er viðurkennd og tjónið verður bætt. Bréfið frá Sjóvá hefði aldrei átt að fara til viðskiptavina eins og það var orðað
• Sérfræðingar Sjóvá munu meta tjónið. Almennt verður farið eftir lögum og reglum um bætur fyrir tjón
• Lögð hefur verið áhersla á það af bæði LN og RARIK að Sjóvá hraði afgreiðslu mála eins og hægt er

Sveitarfélagið mun fylgja málinu eftir af fullum þunga með það að markmiði að íbúar og fyrirtæki í sveitarfélaginu fá greiddar sanngjarnar bætur vegna þess mikla tjóns sem þeir hafa orðið fyrir.